Anghel sa Ayala Triangle

May nagliliwaliw; may nagmamadali. May naglalakad; may kumakain. May matingkad; may mapusyaw. May langit; may lupa. Mayroong pinapangarap; may humihiling ng himala.

O, binibining nakagayak ng matingkad na rosas

Mga matang mapungay na lalong pinabighani ng antipara

Kaulayaw ang mga tahimik na kaibigan

Nakatitigan ngunit pagtingi'y agad inilagan

Nakasalubong nang mas mabilis pa sa kisapmata

Ano kaya ang pangalan mo?

Araw ng puso'y itinakda sa ating pagtatagpo

Hindi ka maalis sa panagimpan ko

Kahit ako'y hindi naaninag ng isip mo

O, kahali-halinang anghel sa mayuming paraiso

Napaibig nang husto sa sulyap mo

Pagsibol ng isang bagong umaga

Mapapasaakin ka't ako'y mapapasaiyo

Kapag nasuntok ko ang buwan

Photo Credits:

Ayala Triangle Gardens on Facebook

mrsoyeon760 on Pinterest